球王级神童横空出世 耶马破比利六十六年纪录

劲爆体育2024欧洲杯：当地时间七月十日媒体消息，西班牙杀入欧国盃决赛，球王级神童拉明耶马横空出世！呢位16岁新星今届赛事光芒四射。

1入波加3次助攻成为西班牙「救世主」，影响力令人联想起17岁嘅「球王」比利率领巴西赢58年世盃冠军。耶马今场亦打破比利保持66年嘅2项国际大赛纪录，下场力争成为史上最年轻冠军。

耶马今届屡破纪录，分组赛成为欧国盃最年轻上阵、最年轻助攻球员，今场对法国正选登场，即打破巴西球王比利喺1958年世盃创下、史上最年轻国际大赛准决赛上阵纪录(17岁244日)。

耶马今仗入波(16岁362日)，再破埋比利喺58年世盃对威尔斯嘅最年轻国际大赛入球纪录(17岁239日)。

西班牙领队富安迪赛后被问到，耶马系咪史上最具影响力嘅16岁球员，富安迪回应：「耶马做紧嘅嘢，预示佢可能会系运动史上嘅伟人，但我哋要帮助佢脚踏实地，用最好方式去进步同成长。」

耶马将会喺今个星期六(13日)迎嚟17岁生日，正正系欧国盃决赛之前，如果耶马可以帮西班牙赢埋冠军，就会成为欧国盃史上最年轻冠军，经典程度足以媲美比利以17岁带领巴西捧世界盃冠军。

耶马表示：「梦想成真，我嚟德国系想赢晒所有比赛，然后同队友一齐庆祝17岁生日！」

延伸阅读：

• 德国有信心成为 2024 年欧洲杯冠军的有力争夺者
• 皮利斯：法国将会找到对付西班牙的赢波方法